WAZIRI MKUU DRC ATEMBELEA MJI WA SERIKALI

Waziri Mkuu wa Jamhuri ya Kidemokrasia ya Congo (DRC) Mhe. Judith Suminwa Tuluka leo  ametembelea na kukagua eneo ambalo litajengwa ofisi ya Ubalozi wa nchi hiyo nchini Tanzania lililopo katika Mji wa Serikali Mtumba Jijini Dodoma.

Katika ziara hiyo, Mhe. Tuluka amekagua eneo hilo sambamba na kuangalia makala maalumu ya video kuhusu Mji wa Serikali ikiwemo ujenzi wa miundombinu yake.

Akizungumza wakati wa ziara hiyo, Waziri Mkuu Tuluka amemshukuru Rais wa Jamhuri ya Muungano wa Tanzania kwa mwaliko huo kadhalika na kushukuru ushirikiano uliopo baina ya Tanzania na Congo na hasa katika masuala ya kiusalama.

“Ushirikiano wa Tanzania na Congo ni wa umuhimu na wa kimkakati hivyo tuendelee kufanya kazi kwa pamoja ili kuweza kukuza uchumi wa nchi hizi” ameeleza Mhe. Tuluka.

Kwa upande wake, Waziri wa Miundombinu kutoka Jamhuri ya Kidemokrasia ya Congo (DRC) John Banza Lunda amesema kuwa, Tanzania ni nchi ya kimkakati hivyo wanatarajia kujenga ubalozi mkubwa  katika Mji wa Serikali-Mtumba jijini Dodoma.

Aidha, ameeleza kuwa, Serikali ya Congo inaendelea na ujenzi wa bandari katika Ziwa Tanganyika ambapo ujenzi huo unatarajiwa kukamilika mwezi Machi, 2027, kukamilika kwa ujenzi huo kutarahisisha usafiri kwa wafanyabiashara na wananchi kati ya nchi hizi mbili.

Nae, Waziri wa Mawasiliano na Teknolojia ya Habari wa Jamhuri ya Muungano ya Tanzania Mhe. Angellah Kairuki amesema, Jijini Dodoma kunapatikana Madini ya lithium kama ilivyo nchini Congo hivyo Tanzania ipo tayari kushirikiana kwa lolote lililopo ndani ya uwezo wake.

Waziri Kairuki ametumia fursa hiyo kumuomba Waziri Mkuu wa Congo kuwashawishi wafanyabiashara nchini Congo kufungua soko ya mvinyo kutoka Jijini Dodoma.

Awali, Mkurugenzi wa Uratibu wa Shughuli za Serikali kutoka Ofisi ya Waziri Mkuu Sera, Bunge, Uratibu na Wenye Ulemavu Bw. Paul Sangawe amebainisha kuwa, ujenzi wa Mji mkuu wa Serikali umezingatia dhana ya “Smart City”, utunzaji wa mazingira, ujenzi wa mifumo ya mawasiliano na miundo yake.

“Fedha za ujenzi wa Mji wa Serikali umetokana na fedha za ndani za Serikali ya Jamhuri ya Muungano wa Tanzania ambapo uratibu wake unafanywa na Ofisi ya Waziri Mkuu Sera, Bunge, Uratibu na Wenye Ulemavu” ameeleza Bw. Sangawe.

Aidha, amebainisha kuwa ujenzi wa mji huo umefanyika kwa awamu mbili ambapo awamu ya kwanza ilianza mwaka 2018 na awamu ya pili ilianza 2021 na unaendelea mpaka sasa.

 

Read More

NCHI ZA EAC ZATAKIWA KUJIPANGA KUKABILIANA NA ATHARI ZA EL NIÑO

Nchi wanachama wa Jumuiya ya Afrika Mashariki (EAC) zimetakiwa kuimarisha ushirikiano na kuchukua hatua za haraka kukabiliana na athari zinazoweza kusababishwa na mvua kubwa za El Niño, zikiwemo mafuriko, maporomoko ya ardhi, uharibifu wa miundombinu na kuathirika kwa biashara na maisha ya kawaida ya wananchi.

Wito huo umetolewa wakati wa ufunguzi wa Mkutano wa Dharura wa Wataalamu wa Sekta Mbalimbali kuhusu Maandalizi na Mwitikio wa Kikanda dhidi ya Mvua Zinazotarajiwa za El Niño Kali, unaofanyika Nairobi, Kenya, kuanzia Novemba 4 hadi 6, 2026.

Ujumbe wa Tanzania katika mkutano huo wa wataalamu  unaongozwa na Mkurugenzi wa Idara ya Menejimenti ya Maafa Ofisi ya Waziri Mkuu (Sera, Bunge, Uratibu na Wenye Ulemavu), Brigedia Jenerali Hosea Ndagala.

Akifungua mkutano huo kwa niaba ya nchi wanachama, Mwenyekiti wa EAC anayewakilisha Uganda amesema utabiri unaonesha uwezekano wa mvua kunyesha kwa kiwango kikubwa kuliko kawaida katika kipindi cha Oktoba hadi Desemba 2026, hali inayohitaji maandalizi ya haraka na hatua za pamoja.

Amezitaka nchi wanachama kubaini maeneo hatarishi katika miundombinu ya usafirishaji, kuandaa njia mbadala, kuhakikisha upatikanaji wa chakula na malisho ya mifugo, pamoja na kuimarisha huduma za afya na ufuatiliaji wa magonjwa yanayoweza kuenea kutokana na mafuriko.

Kwa upande wake, mwakilishi wa Sekretarieti ya EAC amesisitiza kuwa athari za El Niño zinaweza kuhatarisha amani, usalama na maendeleo ya kiuchumi, hivyo juhudi za kila nchi zinapaswa kuunganishwa kupitia mpango wa pamoja wa kikanda.

Mkutano huo unalenga kutathmini uwezo wa nchi wanachama kukabiliana na athari zinazotarajiwa, kubaini mapungufu na kuandaa mpango wa uratibu wa kikanda utakaosaidia kulinda maisha ya wananchi, huduma muhimu na shughuli za biashara katika Afrika Mashariki.

 

Read More

TANZANIA YAPONGEZWA KWA MCHANGO WAKE KATIKA KUBORESHA MIFUMO YA UFUATILIAJI NA TATHMINI AFRIKA

Tanzania imeendelea kutambuliwa kwa mchango wake katika kuimarisha mifumo ya ufuatiliaji, tathmini, utendaji na uwajibikaji kwa umma, ikiwa ni sehemu ya jitihada za kuboresha utawala na utendaji wa Serikali barani Afrika.

Ofisi ya Waziri Mkuu, Sera, Bunge, Uratibu na Wenye Ulemavu, kupitia Idara ya Ufuatiliaji na Tathmini, imewasilisha tuzo maalumu kwa Katibu Mkuu wa Ofisi hiyo, Dkt. Jim Yonazi, iliyotolewa kwa Tanzania kutokana na mchango wake katika kuboresha utawala  barani Afrika kupitia ushiriki wake katika mtandao wa TWENDE MBELE.

Tuzo hiyo imewasilishwa na Mkurugenzi wa Idara ya Ufuatiliaji na Tathmini, Bi. Sakina Mwinyimkuu, ikitokana na matokeo ya kikao kazi cha TWENDE MBELE kilichofanyika jijini Johannesburg, Afrika Kusini.

Utambuzi huo unaonesha mchango wa Tanzania katika kuendeleza mifumo ya ufuatiliaji na tathmini inayosaidia kuboresha utendaji wa Serikali, kuimarisha uwajibikaji na kuongeza ufanisi katika utekelezaji wa mipango na programu za maendeleo.

Katika hatua nyingine, Bi. Mwinyimkuu amemkabidhi Dkt. Yonazi tuzo ya uongozi bora katika kuendeleza ufuatiliaji, tathmini na ujifunzaji nchini Tanzania.

 Tuzo hiyo ilitolewa wakati wa Kongamano la Tano la Wiki ya Ufuatiliaji, Tathmini na Kujifunza (MEL) 2026, lililofanyika jijini Arusha.

 Tuzo hizo ni sehemu ya utambuzi wa mchango wa Tanzania na uongozi katika kuimarisha mifumo ya ufuatiliaji, tathmini na ujifunzaji, ambayo ni muhimu katika kupima matokeo ya utekelezaji wa mipango ya Serikali, kubaini changamoto na kuweka mikakati ya kuboresha utoaji wa huduma kwa wananchi.

 

Read More

VIONGOZI WA TNCM, WAPOKEAJI WA RUZUKU NA WATEKELEZAJI WA PROGRAMU ZA MFUKO WA DUNIA WANOLEWA KUIMARISHA ULINZI WA WANANCHI

Wadau wa sekta ya afya wapewa mafunzo ya siku nne jijini Dar es Salaam kuanzia tarehe 26 hadi 29 Oktoba, 2026, yaliyolenga kuwajengea uelewa kuhusu Kinga Dhidi ya Unyonyaji, Ukatili wa Kingono na Unyanyasaji (Protection from Sexual Exploitation, Abuse and Harassment – PSEAH) ili kuendelea kulinda haki, utu na usalama wa wananchi wanaonufaika na huduma za afya.

Warsha hiyo inalenga kuimarisha mifumo ya ulinzi, uwajibikaji na maadili katika utekelezaji wa programu zinazofadhiliwa na Mfuko wa Dunia wa Kupambana na UKIMWI, Kifua Kikuu na Malaria (Global Fund) na ni sehemu ya juhudi za kujenga uwezo wa taasisi kuzuia vitendo vya unyonyaji, ukatili na unyanyasaji wa kingono, kuweka mifumo madhubuti ya kuripoti matukio, na kuhakikisha manusura wanapata msaada unaozingatia mahitaji yao.

Serikali, kwa kushirikiana na Mfuko wa Dunia, inaendelea kuimarisha usimamizi, uratibu na uwajibikaji katika utekelezaji wa programu hizo, huku ikihakikisha zinazingatia viwango vya juu vya uadilifu na maadili.

Maeneo makuu yaliyotiliwa mkazo wakati wa warsha hiyo ni pamoja na kuimarisha uwezo wa viongozi na wajumbe wa Kamati ya Taifa ya Uratibu wa Mfuko wa Dunia (TNCM) katika usimamizi, utawala unaozingatia maadili, na uwajibikaji katika utekelezaji wa PSEAH na sehemu ya pili inahusisha Wizara ya Fedha kama Mpokeaji Mkuu wa Ruzuku (Principal Recipient – PR), Wizara ya Afya kama Mpokeaji Kiongozi wa Ruzuku Ndogo (Lead Sub-Recipient - LSR), pamoja na wapokeaji wengine wa ruzuku ndogo, kwa lengo la kuimarisha mifumo ya ulinzi ndani ya taasisi zao.

Vilele, inajikita katika utekelezaji salama wa programu, hususan kutathmini na kupunguza hatari za unyonyaji, ukatili na unyanyasaji wa kingono katika ngazi ya utoaji huduma.

Miongoni mwa viongozi walioshiriki warsha hiyo ni Katibu Mkuu, Ofisi ya Waziri Mkuu (Sera, Bunge, Uratibu na Wenye Ulemavu) na Mwenyekiti wa TNCM, Dkt. Jim Yonazi, Makamu Mwenyekiti wa TNCM, Godlisten Moshi, Katibu Mkuu Wizara ya Afya, Dkt. Grace Magembe, pamoja na Naibu Katibu Mkuu, Ofisi ya Rais – TAMISEMI, Prof. Tumaini Nagu, Mkurugenzi wa Tume ya Kudhibiti UKIMWI, Dkt. Adam Mrisho na Katibu Mtendaji wa TNCM, Kent Pius.

Read More

SERIKALI YAENDELEA KUIMARISHA UWEZO WA KUKABILIANA NA MAAFA NCHINI

SERIKALI kupitia Ofisi ya Waziri Mkuu inaendelea kuimarisha uwezo wa nchi katika kujiandaa na kukabiliana na maafa kwa kutoa mafunzo kwa Timu ya Taifa ya Kukabiliana na Dharura, inayolenga kuongeza ufanisi wa uratibu na utekelezaji wa hatua za kukabiliana na matukio ya dharura.

Hayo yamezungumzwa leo, na Mkurugenzi wa Idara ya Uwezeshaji Kiuchumi na Maudhui ya Ndani kutoka Ofisi ya Waziri Mkuu Sera, Bunge, Uratibu na Wenye Ulemavu Bw. Condrad Millinga akifungua mafunzo ya siku mbili, kwa niaba ya Katibu Mkuu wa ofisi hiyo Dkt. Jim Yonazi .

Bw. Milinga amesema, mafunzo kwa timu hiyo ni hatua muhimu katika kuimarisha mfumo wa usimamizi wa maafa nchini, hususan katika kuhakikisha hatua za haraka zinachukuliwa, taarifa sahihi zinapatikana na tathmini za madhara zinafanyika kwa wakati ili kuokoa maisha, kulinda mali na kupunguza athari kwa jamii.

“Timu hii ina majukumu mbalimbali, yakiwemo kushiriki katika operesheni za kukabiliana na maafa, kufanya tathmini za awali ili kubaini hatua za haraka zinazopaswa kuchukuliwa pamoja na kushauri kuhusu mahitaji ya ziada ya rasilimali pale inapohitajika” amesema Bw. Milinga.

Aidha, ameitaka timu hiyo kushiriki katika tathmini za kina za uharibifu na mahitaji yanayotokana na maafa ili kubaini mahitaji ya muda mfupi, wa kati na mrefu kwa maeneo yaliyoathirika.

Hata hivyo ameendelea kusema, majukumu mengine ni kutoa ushauri kwa Kamati ya Wataalam ya Kitaifa ya Usimamizi wa Maafa kuhusu mikakati bora ya kukabiliana na maafa, kuunganisha kongani za kukabiliana na maafa na kushiriki katika mafunzo mbalimbali yanayolenga kuongeza ujuzi na uwezo wa wadau wa kukabiliana na dharura.

Aidha timu hiyo, itashiriki katika kutafuta rasilimali muhimu kwa ajili ya operesheni za dharura na kushirikiana na Idara husika katika kuandaa mipango ya kukabiliana na matukio ya dharura yanapotokea.

Amefafanua kuwa, hatua hiyo italenga kuimarisha utayari wa nchi katika kukabiliana na maafa kwa kuhakikisha kuwa maamuzi yanayofanywa yanazingatia taarifa sahihi, tathmini za kitaalam na mahitaji halisi ya maeneo yaliyoathirika.

Pia amewasisistiza wajumbe wa Timu ya Taifa ya Kukabiliana na Dharura kufanya kazi kwa ukaribu na Idara ya Menejimenti ya Maafa, chini ya uratibu wa Kituo cha Taifa cha Operesheni na Mawasiliano ya Dharura.

Awali, Mkurugenzi wa Idara ya Menejimenti ya Maafa wa ofisi hiyo Brg. Jen. Hosea  Ndagala amesema, Mafunzo hayo yanalenga kuwajengea wajumbe wa timu uelewa wa pamoja, taratibu za utendaji na namna ya kushirikiana katika kutekeleza majukumu yao.  

Ameongeza kuwa, mafunzo hayo yanalenga kuimarisha ushirikiano wa kiutendaji kati ya wajumbe wa Timu ya Taifa ya Kukabiliana na Dharura na Idara ya Menejimenti ya Maafa ili kuhakikisha kuwa taarifa, tathmini na hatua zinazohitajika wakati wa dharura vinapangwa na kuratibiwa kwa ufanisi.

 

 

 

 

Read More

SERIKALI YAENDELEA KUBORESHA URATIBU NA UPATIKANAJI WA MAFUNZO TARAJALI

Serikali inaendelea kuweka mkazo maalum kwenye kuboresha mfumo wa uratibu na upatikanaji wa mafunzo ya utarajali (internship) kwa kuwapatia wahitimu wa kada mbalimbali, uzoefu na ujuzi unaohitajika kwa lengo la kuwafanya wahitimu hao kuwa shindani katika soko la ajira la ndani na nje ya nchi.

Akiongoza kikao cha Makatibu Wakuu kilichofanyika Ofisi ndogo ya Waziri Mkuu jijini Dar es Salaam , Katibu Mkuu, Ofisi ya Waziri Mkuu, Sera, Bunge, Uratibu na Wenye Ulemavu, Dkt. Jim Yonazi, amesema maboresho yanayoendelea kufanyika ni sehemu ya utekelezaji wa maelekezo ya Makamu wa Rais wa Jamhuri ya Muungano wa Tanzania, Mhe. Deogratius Ndejembi, aliyoyatoa wakati akimwakilisha Rais wa Jamhuri ya Muungano wa Tanzania, Mhe. Dkt. Samia Suluhu Hassan, kwenye kikao kazi cha wenyeviti wa bodi na watendaji wakuu wa taasisi na mashirika ya umma (C-COEs Forum 2026) tarehe 28 Septemba, 2026 jijini Arusha.

Katika kikao kazi cha wenyeviti wa bodi na watendaji wakuu wa taasisi na mashirika ya umma, Mhe. Makamu wa Rais alielekeza kuandaliwa kwa mpango wa mafunzo kwa vitendo utakaowawezesha angalau vijana 10,000 kupata uzoefu katika mashirika ya umma na wengine 20,000 kwenye sekta binafsi, ikiwa ni sehemu ya utekelezaji wa Dira ya Taifa ya Maendeleo 2050, hususani nguzo ya pili inayosisitiza maendeleo ya watu na rasilimali watu nchini.

Katika kikao hicho cha Makatibu Wakuu, Dkt. Yonazi amesema kuwa Serikali inaendelea kuweka kipaumbele kikubwa kwenye masuala ya mafunzo kwa vitendo (internship) kwa wahitimu ili kuziba pengo la kutokuwa na uzoefu, na kuwapa wahitimu hao uwezo wa kuunganisha elimu ya darasani na uhalisia wa mazingira ya kazi pamoja na kuongeza ushindani kwenye soko la ajira.

“Mafunzo ya ujuzi na uzoefu wa kazi yanapatikana kupitia taasisi mbalimbali za Serikali, vyuo vya ufundi, na programu za kitaifa zinazolenga kuwaandaa vijana kuwa shindani katika soko la ajira”, ameeleza Dkt. Yonazi.

Kikao hicho kiliwashirikisha Makatibu Wakuu wa kisekta kutoka Ofisi ya Rais, Menejimenti ya Utumishi na Utawala Bora, Ofisi ya Rais Mipango na Uwekezaji, Ofisi ya Rais Maendeleo ya Vijana, Ofisi ya Waziri Mkuu-Tawala za Mikoa na Serikali za Mitaa, Ofisi ya Waziri Mkuu - Kazi, Ajira na Mahusiano, Wizara ya Fedha, Wizara ya Kilimo, Wizara ya Elimu, Sayansi na Teknolojia pamoja na Wizara ya Ujenzi.

 

Read More

TANZANIA YAIMARISHA MAPAMBANO DHIDI YA VVU NA UKIMWI KUELEKEA 2030

Ofisi ya Waziri Mkuu, Sera, Bunge, Uratibu na Wenye Ulemavu kupitia Tume ya Kudhibiti UKIMWI Tanzania (TACAIDS), imeendelea kuongeza kasi ya upimaji wa Virusi vya Ukimwi (VVU) na kujikinga dhidi ya virusi hivyo kwa kuongeza kasi ya afua za kinga, upimaji na matibabu, ikiwa ni sehemu ya jitihada za kutokomeza UKIMWI kama tishio la afya ya umma ifikapo mwaka 2030.

Hatua hizo zimeelezwa Bungeni Jijini Dodoma na Waziri wa Nchi Ofisi ya Waziri Mkuu, Sera, Bunge, Uratibu na Wenye Ulemavu, Mhe. Prof. Palamagamba Kabudi, wakati akiwasilisha taarifa ya utekelezaji wa afua za kudhibiti maambukizi ya VVU na UKIMWI katika mikoa yenye kiwango cha juu na chini cha maambukizi,  na taaarifa ya utekelezaji wa majukumu ya Baraza la Taifa la Watu Wanaoishi na VVU Tanzania (NACOPHA) katika kipindi cha Januari 2021 hadi Septemba 2026, kwa Kamati ya Kudumu ya Bunge ya Afya na Masuala ya UKIMWI.

Waziri Kabudi ameeleza kuwa katika jitihada za kuhakikisha kwamba nchi inafikia malengo ya kuuondoa UKIMWI kama tishio la afya kwa umma ifikapo mwaka 2030, Tanznaia imeweza kuendeleza afua mbalimbali katika mwitikio wa kupambana na VVU na UKIMWI, ikiwemo kufufua kiwanda cha kutengeneza dawa na vifaa tiba cha Tanzania Pharmaceutical industries Ltd (TPI) kilichopo mkoani Arusha, ambacho kinazalisha dawa za kufubaza makali ya VVU (ARV) na hivyo kuleta uhakika wa upatikanaji wa huduma kufubaza VVU.

Kwa upande mwingine, Mheshimiwa Waziri amesisitiza ushirikiano kati ya Serikali, TACAIDS, NACOPHA, Serikali za Mitaa, asasi za kiraia, sekta binafsi, washirika wa maendeleo na jamii, katika kuongeza uelewa, kupunguza unyanyapaa na kuhakikisha huduma za kinga na matibabu zinawafikia vijana, wanawake na makundi yaliyo katika mazingira hatarishi ya kuoata aambukizi.

Kwa upande wake, Mkurugenzi Mtendaji wa TACAIDS, Dkt. Adam Mrisho amesema Tanzania imepiga hatua katika kupunguza maambukizi mapya ya VVU, vifo vitokanavyo na UKIMWI, maambukizi kutoka kwa mama kwenda kwa mtoto na kuimarisha upatikanaji wa huduma za kinga, tiba na matunzo.

“Lengo ni kuhakikisha vifo venabaki kua vichache. Waliokua na VVU wamefubaza VVU kwa kuhakikisha wametumia dawa vizuri na wasiweze kuambukiza wengine” amesema Dkt. Mrisho.

Naye, Mtendaji Mkuu wa NACOPHA Bw. Deogratius Rutatwa ameishukuru serikali kwa upatikanaji wa huduma za matibabu na dawa kinga, hali inayofanya watu wanaoishi na VVU waishi kwa kujiamini na sio kwa matumaini.

Serikali inaendelea kutekeleza afua mbalimbali ikiwemo upimaji wa VVU, usambazaji wa kinga, tohara salama na hiari kwa wanaume, kuzuia maambukizi kutoka kwa mama kwenda kwa mtoto,unyanyapaa, na huduma za matibabu na Matunzo.

 

 

Read More

WADAU WAHIMIZWA KUIMARISHA USHIRIKIANO KATIKA KUWAWEZESHA WATU WENYE ULEMAVU

Ofisi ya Waziri Mkuu Sera, Bunge, Uratibu na Wenye Ulemavu kupitia Kitengo cha Huduma kwa Watu Wenye Ulemavu imewahimiza wadau kuimarisha ushirikiano na Serikali katika kuhakikisha watu wenye ulemavu wanapata huduma stahiki na fursa za uwezeshaji kiuchumi ili waweze kujitegemea na kushiriki kikamilifu katika shughuli za maendeleo nchini.

 Wito huo umetolewa leo  na Kaimu Mkurugenzi wa Kitengo cha Huduma kwa Watu Wenye Ulemavu Bw. Kizito Wambura wakati wa ufunguzi wa kikao kazi kilichowakutanisha Ofisi ya Waziri Mkuu, Shirika la Sense International Tanzania na Chuo cha Ufundi Stadi na Utengamao kwa Watu Wenye Ulemavu cha Sabasaba kilichopo Mkoani Singida kwa lengo la kupokea taarifa ya utekelezaji wa mradi wa kuwawezesha vijana wenye ulemavu kupitia mafunzo ya ufundi stadi.

Bw. Wambura amesema mradi huo ni muhimu katika kuwajengea vijana wenye ulemavu ujuzi na uwezo wa kujitegemea kiuchumi, kwa kuwawezesha kujiajiri au kuajiriwa baada ya kuhitimu mafunzo na kusisitiza umuhimu wa kuimarisha mawasiliano na mtiririko wa taarifa kati ya wadau na Serikali kuhusu shughuli zinazotekelezwa, ili Serikali iweze kufahamu juhudi hizo na kuongeza nguvu pale inapohitajika.

Aidha, amezitaka Sense International Tanzania  na Chuo cha Sabasaba kuhakikisha utekelezaji wa mradi huo unaleta matokeo chanya kwa vijana wanaonufaika, hususan katika kuwapatia ujuzi unaokidhi mahitaji ya soko la ajira na kuwawezesha kutumia fursa zilizopo kujikwamua kiuchumi.

Kwa upande wake Mkurugenzi wa Sense International Bw. Julius Mahundi, ameishukuru Serikali kupitia Ofisi ya Waziri Mkuu kwa ushirikiano inayotoa katika kuboresha ustawi wa watu wenye ulemavu.

Amesema shirika hilo linatarajia kuwa mradi huo utasaidia kukabiliana na changamoto zinazowakabili vijana wenye ulemavu kwa kuwawezesha kupata elimu, mafunzo, taarifa sahihi na fursa za masoko.

Mradi huo unaotekelezwa kuanzia mwaka 2024 hadi 2027 na Sense International kwa kushirikiana na Chuo cha Ufundi Stadi na Utengamao wa Watu Wenye Ulemavu cha Sabasaba kilichopo mkoani Singida unalenga kunufaisha vijana wenye ulemavu wenye umri wa miaka 15 hadi 35. Mradi huo umefadhiliwa na Farao Island na Hodge International.

 

Read More

SIMANJIRO YAZINDUA MPANGO WA KUJIANDAA NA KUKABILIANA NA MAAFA

Mwenyekiti wa Halmashauri ya Wilaya ya Simanjiro Mhe. Kaleya Melita Mollel ameitaka Kamati za Usimamizi wa Maafa wa Halmashauri hiyo kutekeleza yale yaliyomo kwenye Mpango wa Kujiandaa na kukabiliana na Maafa wa Halmashauri ya Simanjiro ili kuimarisha usimamizi wa maafa katika Wilaya hiyo.

Mhe. Mollel ameyasema hayo l katika ukumbi wa mikutano wa halmashauri ya wilaya hiyo wakati akizindua Mpango wa Kujiandaa na Kukabiliana na Maafa wa Wilayani ukiwa na lengo la kutoa miongozo na taratibu za kujiandaa na kukabiliana na maafa katika halmashauri ya wilaya na hasa katika kipindi hiki cha mvua za msimu.

“Nitoe wito nendeni mkatekeleze yaliyomo kwenye mpango huu, mpango huu usibaki kwenye makaratasi kwani ni nyezo muhimu ya usimamizi wa maafa katika halmashauri yetu” amesisitiza Mhe. Mollel.

Kwa upande wake, Mkurugenzi Msaidizi Ofisi ya Waziri Mkuu Sera, Bunge, Uratibu na Wenye Ulemavu, Kanali Selestine Masalamado amesema kuwa, mpango huo umeandaliwa kwa kuzingatia matokeo ya tathmini ya vihatarishi na uwezo wa wilaya wa kukabiliana na maafa, pamoja na historia ya matukio ya maafa yaliyoikumba Wilaya ya Simanjiro.

“Mpango huu ni matokeo ya mchakato shirikishi uliohusisha taasisi na wadau mbalimbali wa usimamizi wa maafa katika ngazi ya wilaya hivyo tunatarajia mpango huu utawezesha masuala mbalimbali ikiwemo uratibu wa shughuli za usimamizi wa maafa katika hatua zote za usimamizi wa maafa (Kuzuia, Kujiandaa, Kukabili na Kurejesha hali)” amefafanua Kanali Masalamado.

Aidha, ameongeza kuwa, maandalizi ya mpango huo ni hatua muhimu katika kuimarisha utekelezaji wa Sera ya Usimamizi wa Maafa ya Mwaka 2004 (Toleo la Mwaka 2025) pamoja na Sheria ya Usimamizi wa Maafa Na. 6 ya Mwaka 2022, kwa kuweka mikakati madhubuti ya kujiandaa na kukabiliana na maafa.

“Ofisi ya Waziri Mkuu, kupitia Idara ya Usimamizi wa Maafa, itaendelea kushirikiana nanyi, Wilaya ya Simanjiro katika shughuli za usimamizi wa maafa kwani usimamizi madhubuti wa maafa ni jukumu letu sote, kila mmoja ashiriki sasa na achukue hatua katika eneo lake, ili kulinda maisha na mali” ameongeza Kanali Masalamado.

Tathmini ya vihatarishi, uwezekano wa kutokea na uwezo wa kukabili maafa iliyofanyika katika Halmashauri ya Wilaya ya Simanjiro inaonesha kuwa, halmashauri hiyo inakabiliwa na majanga ya ukame, mafuriko, Migongano kati ya Wanyamapori na binadamu, moto magonjwa ya milipuko (binadamu, mifugo na wanyamapori) upepo mkali pamoja na mimea vamizi.

 

 

Read More

MHE. MMUYA ATOA KONGOLE KWA UBALOZI WA TANZANIA NCHINI MSUMBIJI KWA KUENDELEA KUIMARISHA DIPLOMASIA YA UCHUMI

Naibu Waziri wa Ardhi, Nyumba na Maendeleo ya Makazi Mhe. Kaspar Mmuya ameupongeza Ubalozi wa Jamhuri ya Muungano wa Tanzania nchini Msumbiji kwa namna unavyoendelea kuimarisha diplomasia ya uchumi kwa kutangaza fursa mbalimbali za kibiashara na uwekezaji kati ya Tanzania na Msumbiji.

Mhe. Mmuya ametoa pongezi hizo alipotembelea ofisi hizo pamoja na ujumbe alioongozana nao kwa lengo la kushiriki Kongamano la Usimamizi wa Maafa kuhusu Kupunguza Hatari za Maafa na Kuimarisha Ustahimilivu wa Bara la Afrika dhidi ya majanga kwa niaba ya Waziri wa Nchi Ofisi ya Waziri Mkuu (Sera, Bunge, Uratibu na wenye Ulemavu) Mhe. Prof. Palamagamba Kabudi.Kongamano hilo linalofanyika kwa siku tatu kuanzia tarehe 13 hadi 15 Oktoba, 2026 Jijini Maputo Nchini Msumbiji.

Amesema kuwa, Ubalozi huo, chini ya uongozi wa Mhe. CP. Hamad Khamis Hamad, Balozi wa Jamhuri ya Muungano wa Tanzania nchini humo unazidi kufungua milango ya ushirikiano wa kimkakati katika sekta za kipaumbele ikiwemo Biashara na Uwekezaji kwa kushirikisha kampuni za Kitanzania katika sekta mbalimbali kama vile sekta ya mafuta, gesi, na nishati na kuhamasisha ushiriki wao katika soko la Msumbiji.

“Mmeendelea kufanya kazi nzuri yenye tija kwa Taifa letu kwa kuendelea kuimarisha ushirikiano wa kikanda kupitia maeneo ya usafirishaji wa baharini na maendeleo ya bandari ili kurahisisha mzunguko wa mizigo, hii inaimarisha diplomasia yetu na nchi ya Msumbiji,” alisema Mhe. Mmuya

Akitoa taarifa kuhusu Ofisi za Ubalozi huo, Mheshimiwa CP. Balozi Hamad amesema wameendelea kuhakikisha wanaimarisha diplomasia kwa kuzitangaza fursa zilizopo na kuendelea kuimarisha mahusiano ya nchi hizo mbili.

Aidha Balozi Hamad amemshukuru Naibu Waziri Mmuya kwa kutenga muda na kutembelea ofisi hizo na kusema kuwa, wataendelea kuiwakilisha vyema Nchi ya Tanzania na kuitangaza ili kuvutia wafanyabiashara na wawekezaji waje nchini kuwekeza. 

 AWALI

Kongamano la Usimamizi wa Maafa kuhusu Kupunguza Hatari za Maafa na Kuimarisha Ustahimilivu wa Bara la Afrika dhidi ya majanga hilo limeandaliwa na Kamisheni ya Umoja wa Afrika (AUC) kwa kushirikiana na Serikali ya Jamhuri ya Msumbiji pamoja na Sekretarieti ya SADC. Kaulimbiu ya Kongamano hilo ni “Kuimarisha Utawala katika Usimamizi wa Maafa na Uwekezaji wa Kimkakati ili kupunguza hatari za Maafa na kujenga Afrika imara inayostahimili majanga"

 

Read More

MONDULI YAZINDUA MPANGO WA KUJIANDAA NA KUKABILIANA NA MAAFA

Mkuu wa Wilaya ya Monduli Mhe. Gloriana Kimath amezindua Mpango wa Kujiandaa na Kukabiliana na Maafa wa Halmashauri ya Wilayani ya Monduli ukiwa na lengo la kutoa miongozo na taratibu za kujiandaa na kukabili maafa katika halmashauri ya wilaya hiyo na hasa tunapoelekea katika mvua za msimu zinatotarajiwa.

Mhe. Kimath amezindua mpango huo sambamba na kufungua kikao kazi cha Kamati za Usimamizi wa Maafa za Wilaya ya Monduli na kuimarisha utoaji wa matumizi ya taarifa za tahadhari za awali katika kujiandaa na kukabiliana na madhara ya El Niño leo katika ukumbi wa mikutano wa halmashauri ya wilaya hiyo.

Akizungumza wakati wa uzinduzi wa mpango huo Mhe. Kimath amewataka Kamati za Usimamizi wa Maafa za Wilaya, wataalamu na wadau mbalimbali kufanya kazi kwa ushirikiano ili kuwa na uelewa wa pamoja wa namna ya kukabiliana na maafa.

“Katika juhudi za kuwa na utayari wa kukabiliana na majanga na usimamizi wa maafa kwa ufanisi, Halmashauri ya Wilaya ya Monduli imeshirikiana na Ofisi ya Waziri Mkuu katika kutambua umuhimu wa kuandaa Mkakati wa Kupunguza Vihatarishi vya Maafa unaotoa mwongozo wa namna ya kuratibu na kusimamia upuguzaji wa vihatarishi vya maafa katika wilaya yetu” ameeleza Mhe. Kimath.

Kwa upande wake, Mkurugenzi Msaidizi Ofisi ya Waziri Mkuu Sera, Bunge, Uratibu na Wenye Ulemavu, Dkt. Salum Manyatta amesema kuwa, mpango huo umeandaliwa kwa kuzingatia matokeo ya Tathmini ya Vihatarishi na Uwezo wa wilaya wa kukabiliana na maafa, pamoja na historia ya matukio ya maafa yaliyoikumba Halmashauri ya Wilaya ya Monduli.

“Mpango huu ni matokeo ya mchakato shirikishi uliohusisha taasisi na wadau mbalimbali wa usimamizi wa maafa katika ngazi ya wilaya hivyo tunatarajia mpango huu utawezesha masuala mbalimbali ikiwemo uratibu wa shughuli za usimamizi wa maafa katika hatua zote za usimamizi wa maafa (Kuzuia, Kujiandaa, Kukabili na Kurejesha hali)” amefafanua Dkt. Manyatta.

Aidha, Dkt. Manyatta amesisitiza kuwa, mpango huo utekelezwe usibaki kwenye makaratasi kwani ni nyenzo ya usimamizi wa maafa, hivyo unapaswa kuunganishwa na mipango, bajeti na shughuli za maendeleo za wilaya, pia Kamati za Usimamizi wa Maafa kwa kushirikiana na wadau  zihakikishe upatikanaji na utengaji wa rasilimali zinazohitajika kwa ajili ya utekelezaji wake.

Nae, Mwakilishi kutoka Shirika la Mpango wa Chakula Duniani (WFP) Bi.Sandra  Hakim, amepongeza mamlaka za Halmashauri ya wilaya na wadau wote waliohusika katika kuandaa mpango huo.

Read More

OFISI YA WAZIRI MKUU YATOA WITO KWA SEKTA BINAFSI KUWA TAYARI KUKABILIANA NA EL NIÑO.

Ofisi ya Waziri Mkuu Sera, Bunge, Uratibu na Wenye Ulemavu kupitia Idara ya Menejimenti ya Maafa imetoa wito kwa wakuu wa taasisi binafsi nchini kuendelea kushirikiana na Serikali katika juhudi za kujiandaa, kukabiliana na kurejesha hali baada ya kutokea kwa majanga, hususan athari zinazoweza kusababishwa na mvua za El Niño zilizotabiriwa na Mamlaka ya Hali ya Hewa Tanzania (TMA).

Wito huo umetolewa na Mkurugenzi Msaidizi wa Operesheni na Mawasiliano ya Dharura kutoka Ofisi ya Waziri Mkuu Kanali Selestine Masalamado wakati akizungumza katika Jukwaa la Majadiliano la Wakuu wa Taasisi Binafsi Tanzania (CEOrt) jijini Dar es Salaam, ambapo amesisitiza umuhimu wa sekta binafsi kuwa sehemu ya maandalizi na utekelezaji wa mikakati ya kukabiliana na maafa nchini.

Kanali Masalamando ameeleza kuwa Serikali imechukua hatua za kujiandaa kukabiliana na athari zinazoweza kujitokeza kutokana na mvua hizo, kwa kuimarisha uratibu wa shughuli za menejimenti ya maafa, ufuatiliaji wa taarifa za tahadhari na mawasiliano ya dharura, pamoja na kuhamasisha ushirikiano wa wadau katika kupunguza vihatarishi na kujiandaa kukabiliana na athari zinazoweza kutokea.

Amesisitiza kuwa, maandalizi dhidi ya maafa yanahitaji ushirikiano wa karibu kati ya Serikali, sekta binafsi, mashirika na wananchi ili kuhakikisha taarifa za tahadhari zinawafikia watu kwa wakati na hatua stahiki zinachukuliwa kulinda maisha, mali na shughuli za kiuchumi.

Aidha, amewaalika wakuu wa taasisi binafsi na wadau wengine kuchangia kwa hali na mali katika juhudi za kukabiliana na athari za El Niño, akieleza kuwa ushiriki wa sekta binafsi kupitia rasilimali fedha, vifaa, utaalamu na huduma mbalimbali unaweza kusaidia kuimarisha maandalizi, utoaji wa msaada wa dharura na urejeshaji wa hali katika maeneo yatakayoweza kuathirika.

Ameongeza kuwa ushirikiano huo unapaswa kuzingatia mahitaji ya makundi yote ya wananchi, wakiwemo watu wenye ulemavu, watoto, wazee na makundi mengine yaliyo katika mazingira hatarishi, ili kuhakikisha hakuna anayeachwa nyuma katika maandalizi na utekelezaji wa hatua za kukabiliana na maafa.

Read More

MHE. MMUYA AONGOZA UJUMBE WA TANZANIA KATIKA KONGAMANO LA USIMAMIZI WA MAAFA NCHINI MSUMBIJI

Naibu Waziri wa Ardhi, Nyumba na Maendeleo ya Makazi Mhe. Kaspar Mmuya akimwakilisha Waziri wa Nchi Ofisi ya Waziri Mkuu (Sera, Bunge, Uratibu na wenye Ulemavu) Mhe. Prof. Palamagamba Kabudi ameongoza ujumbe wa Tanzania katika Kongamano la Usimamizi wa Maafa kuhusu Kupunguza Hatari za Maafa na Kuimarisha Ustahimilivu wa Bara la Afrika dhidi ya majanga linalofanyika kwa siku tatu kuanzia tarehe 13 hadi 15 Oktoba, 2026 Jijini Maputo Nchini Msumbiji.

Kongamano hilo limefunguliwa rasmi hii leo  na Rais wa Jamhuri ya Msumbiji Mhe. Daniel Chapo na kueleza kuwa limekuja wakati sahihi na mahali sahihi kwa kuzingatia changamoto za mabadiliko ya tabianchi yanayosababisha ongezeko la majanga mbalimbali ikiwemo ya ukame, mafuriko, matetemeko ya ardhi, vimbunga vya baharini na mengine mengi.

Ameeleza kuwa ujio wa nchi zote husika kwa lengo la kuweka mikakati ya pamoja kwa majanga ya aina zote ikiwemo ya asili na yale yasiyo ya asili ni hatua muhimu kwa kuzingatia kuwa majanga yanatokea kila mahali lakini madhara hutofautiana kulingana na maandalizi na mipango ya nchi husika katika kukabili maafa.

“Lazima kuwe na mipango imara ya kiuchumi na kijamii katika kukabili maafa, upande wa Msumbiji imeendelea kujithatiti kuhakikisha inakabili maafa na kujiweka tayari, nashukuru uwepo wa Kongamano hilo ambalo limetuleta pamoja ili tuweke mikakati ya kukabiliana na maafa kwa nchi zetu za Afrika, na kuhakikisha tunapunguza madhara yatokanayo na maafa,”alisisitiza

Lengo kuu la Kongamano hilo ni kuchochea mabadiliko ya kimkakati ili kuimarisha uwezo wa kukabiliana na athari za ukame na kupunguza hatari za maafa kwa kuimarisha mifumo ya kiutawala  katika usimamizi wa maafa na kuongeza uwekezaji wa kimkakati ili kuimarisha ustahimilivu dhidi ya majanga. 

Aidha, Kongamano hilo limekusudia kutoa fursa ya kujadili mikakati ya ugharamiaji wa hatua za mapema, kuweka mikakati thabiti ya kuzuia majanga kabla hayajatokea na kutafuta ufumbuzi wa changamoto za upatikanaji wa rasilimali kwa ajili ya kukabiliana na changamoto zitokanazo na mabadiliko ya tabianchi na uwekezaji wa muda mrefu.

Vilevile, Kongamano linatarajiwa kushirikisha wadau na sekta mbalimabli ili kuleta pamoja watunga sera, jumuiya za kiuchumi za kikanda, taasisi za kifedha, washirika wa maendeleo, wasomi, sekta binafsi, na asasi za kiraia ili kuwaza kuhakikisha uwajibikaji wa pamoja.

Kongamano hilo limeandaliwa na Kamisheni ya Umoja wa Afrika (AUC) kwa kushirikiana na Serikali ya Jamhuri ya Msumbiji pamoja na Sekretarieti ya SADC. Kaulimbiu ya Kongamano hilo ni “Kuimarisha Utawala katika Usimamizi wa Maafa na Uwekezaji wa Kimkakati ili kupunguza hatari za Maafa na kujenga Afrika imara inayostahimili majanga"

Read More

NAIBU WAZIRI NDERIANANGA AKUTANA NA UNICEF KUJADILI MIKAKATI YA KUWALINDA WATOTO WENYE ULEMAVU DHIDI YA MADHARA YA EL NIÑO.

 Naibu Waziri wa Nchi Ofisi ya Waziri Mkuu Sera, Bunge, Uratibu na Wenye Ulemavu Mhe. Ummy Nderiananga pamoja na wataalam kutoka Idara ya Menejimenti ya Maafa na Kitengo cha Huduma kwa Watu Wenye Ulemavu amekutana na Ujumbe kutoka Shirika la Umoja wa Mataifa la Kuhudumia Watoto (UNICEF) kwa lengo la kujadili mikakati ya kuwasaidia watoto wenye ulemavu katika  kujiandaa, kukabiliana na kurejesha hali baada ya madhara yanayoweza kusababishwa na mvua za El Niño, Kikao hicho kimefanyika Oktoba 9, 2026 katika Ofisi ya Waziri Mkuu jijini Dodoma.

Akizungumza wakati wa ufunguzi wa kikao hicho Naibu Nderiananga, ameipongeza UNICEF kwa utayari wake wa kuendelea kushirikiana na Serikali katika kuimarisha ulinzi na usalama wa watoto wenye ulemavu wakati wa maafa, Amesisitiza umuhimu wa kundi hilo kupewa kipaumbele kutokana na changamoto zinazoweza kukabili katika hatua za tahadhari, uokoaji na urejeshaji wa hali baada ya maafa.

Mhe. Nderiananga amesema, Sheria ya Maafa imeweka msingi wa kugawa majukumu ya usimamizi na kukabiliana na maafa kuanzia ngazi ya Taifa hadi kata,aidha amewahimiza UNICEF na wadau wengine kushirikiana na Serikali katika upatikanaji wa vifaa vya uokoaji na urejeshaji wa hali, pamoja na kuunga mkono juhudi zinazotekelezwa kupitia Mfuko wa Taifa wa Maafa.

Katika kuimarisha upatikanaji wa taarifa za tahadhari kwa watu wenye ulemavu, Ofisi ya Waziri Mkuu imeandaa vipeperushi vya Nukta Nundu, maandishi makubwa na video fupi ya Lugha ya Alama, hatua hiyo inalenga kuhakikisha taarifa kuhusu hatua za kuchukua kukabiliana na madhara ya El Niño zinawafikia watu wenye ulemavu kwa njia zinazozingatia mahitaji yao.

Kwa upande wake, Naibu Mwakilishi wa Miradi wa UNICEF Bi. Patricia Lombo, ameipongeza Serikali kwa ushirikiano unaotolewa katika kuboresha ustawi wa watoto, hususani wenye ulemavu.

Amesema, UNICEF iko tayari kuendelea kuiunga mkono Serikali kwa rasilimali fedha na utaalamu katika kuimarisha maandalizi, mwitikio na urejeshaji wa hali baada ya majanga, kwa kuzingatia mahitaji ya watoto wenye ulemavu.

Read More

SERIKALI YAWEKA MKAZO USHIRIKI SAWA WA JINSIA BARAZA LA VYAMA VYA SIASA

Serikali yaendelea  kuhimiza ushirikishwaji sawa wa kijinsia katika  Baraza la Vyama vya Siasa ili kuendelea kutimiza wajibu wake wa kikatiba na kisheria katika kulijenga taifa.

Kauli hiyo  imetolewa na Waziri wa Nchi Ofisi ya Waziri Mkuu ( Sera Bunge na Uratibu na Wenye Ulemavu) Prof. Palamagamba Kabudi katika tukio la uzinduzi uongozi mpya wa Baraza la Vyama vya  Siasa na Nembo ya Baraza la Siasa lililofanyika  Jijini Dar es Salaam.

Waziri Kabudi amemshukuru Mhe. Rais, Dkt, Samia Suluhu Hassan kwa kuendelea kuvipa nafasi sawa vyama vya siasa ya kukutana naye, kujadiliana na kutoa maoni yao.

“Vikao vya Baraza la Vyama vya Siasa ni muhimu katika kuongeza uelewa umuhimu mfumo wa demokrasia ya vyama vingi, ambao sio vitisho au uhasama ni mfumo wa kuwasaidia  wananchi wenye mawazo tofauti na maoni tafauti kukaa pamoja kujadili mstakabili wa taifa lao, “ alieleza.

Aidha uzinduzi wa nembo ya baraza itatumika kutambulisha baraza lakini nembo hiyo itakuwa ni alama katika matumizi ya  nyaraka za Baraza la Vyama vya Siasa.

kwa upande wake Msajili wa Vyama vya Siasa Jaji Fransis Mutungi alisema nchi yetu ni mfano wa kuigwa kwa utamaduni uliojengwa wakukaa pamoja  licha ya tofauti ya kisiasa jambo hilo ni tunuu ambayo inapaswa kulindwa.

"Alisema hata inapotokea ukinzani wa hoja, huwa tunaibuka na hoja za kitaifa, hivyo tunapaswa kuendelea kulijenga baraza hili liwe  mfano wa kuingwa katika bara la afrika," alieleza Msajili

Ofisi ya Msajili itaendelea kuhakikisha kwamba Baraza la Vyama vya Siasa linaendelea kuwa jukwaa imara la majadiliano ushauri na ushirikiano katika kukuza na kudumisha siasa za kistaarabu.

Awali Makamu Mwenyekiti wa Baraza  la Vyama vya Siasa Ndg. Aggrey Mwanri  alisema baraza hili halimnyimi mtu kuwa na mawazo mbadala, lakini tunajadiliana hoja zenye maslahi mapana ya ustawi wa nchi yetu kwa kuangalia mshikamano wa nchi, na umoja wa taifa letu.

Naye Rais wa Chama cha Wanasheria  Tanganyika (TLS) Wakili Boniface Mwabukusi,  alitoa rai kwa kwa msajili wa vyama vya siasa kupitia sheria ya vyama vya siasa kuona umuhimu wa kuanzishwa kwa kamati ya siasa kushughulikia makosa ya kisiasa ili kutatua changamoto za kisiasa kabla ya kupelekwa katika mifumo mingine.

 

Read More